Matematikk 1T-Y er ute

Det har over tid vore ein stor nedgang i talet på skular som tilbyr, og elevar som vel, matematikk 1T-Y. Frå neste skuleår er matematikk 1T-Y borte som tilbod.

Få har hatt tilbodet
Elevar på yrkesfaglege utdanningsprogram skal ha 84 timar matematikk fellesfag i vg1. Skulane har fram til i år hatt høve til å tilby matematikk 1P-Y og matematikk 1T-Y, altså ein praktisk eller teoretisk retta matematikk. Kun fem skular har hatt tilbod om 1T-Y dei siste åra.

Berre fire fylke sende inn kommentarar til forslaget, og av desse var det berre Akershus som var negativ til forslaget om å fjerne fagtilbodet. I Oslo er det ingen skular som har 1T-Y, men fleire yrkesfaglege skular tilbyr 1T og R1 til elevar som ønsker matematikk på høgare nivå i det yrkesfaglege løpet sitt.

Kritisk for elektro og data
Dei fleste som har svart på høyringa, meiner det er uproblematisk å fjerne 1T-Y, men Fagleg råd for elektro og datateknologi er kritisk til forslaget. Rådet meiner at å fjerne 1TY vil senke nivået på den teoretiske matematikken, som elevane treng innanfor elektro og datateknologi.

– Matematikk er en grunnpilar i elektrofagene, og fagarbeidere i elektrofag er avhengig av en grunnleggende matematisk forståelse for å utøve faget og yrket, i og med at elektrofagarbeidere arbeider med abstrakte verdier og begreper. Et eksempel er dimensjonering av kabel og sikringer, hvor en fagarbeider må kunne beregne strøm og spenning. I enhver feilsituasjon en fagarbeider kommer borti, er matematikk det grunnleggende verktøyet hen trenger for å rette feilen, skriv rådet i høyringssvaret.

Direktoratet sitt hovudargument for å fjerne faget er at få skular tilbyr 1T-Y, og at få elever vel faget. Fagleg råd for elektro og datateknologi problematiserer dette:

– Elever kan ikke velge 1-TY hvis de ikke får muligheten til å velge det. Rådet stiller derfor spørsmål ved om det er en behovsvurdering av faget som ligger til grunn for Udirs forslag om å fjerne 1-TY, eller om forslaget snarere bunner i spørsmål om organisering og økonomi.

Kunnskapsdepartementet vedtok å fjerne fagtilbodet, og endringa trer i kraft 1. august 2026.